好多朋友都話：「你每個星期都要搭1.5鐘車出屯門唔煩咩？仲要對住啲屎屎尿尿唔怕臭咩？」對於呢啲「問題」我反而覺得佢哋令我嘅夢想更加得到肯定，因為我完全唔介意企足成日，同埋做呢啲「厭惡性」工作。我更加確定我嘅夢想係做一位獸醫，幫助動物，減少佢地要承受嘅痛苦。
本來以為係arc淨係純粹幫狗仔沖吓涼執吓屎，但做義工嘅時間越長，我發覺我學到嘅嘢遠超於我本來嘅預期。每次做義工都會學到新知識，例如唔同品種嘅狗會有啲乜嘢遺傳病，唔同種類嘅疫苗對狗仔有咩作用，仲有好多齋睇書係唔會領悟到嘅親身體驗。所以每次離開都會覺得好充實，好想快啲到下星期可以再做義工。加上每次做義工我都可以放下任何學業等嘅煩惱壓力，所以我都覺得係到做義工係我嘅舒壓方法。
好記得一開頭照顧嗰隻有中風後遺症嘅拉薩，由企都企唔到，到依家可以落街跑步；由餵佢飲奶，到依家可以食乾糧，嗰種睇住狗仔康復嘅滿足感係文字唔能夠盡訴。
我好希望多啲人可以透過係arc做義工感同身受，繼續幫助被遺棄嘅動物！